Section 1: Malayalam Story

പന്നികളും ചെന്നായയും — The Three Little Pigs

പണ്ടു പണ്ടൊരിടത്ത് മൂന്ന് പന്നിക്കുട്ടികളുണ്ടായിരുന്നു. അവർ മൂവരും നല്ല സുഹൃത്തുക്കളായിരുന്നു. ഒരിക്കൽ അവർ യാത്ര ചെയ്തു മനോഹരമായ ഒരു കുന്നിൻചരുവിലെത്തി. ആ സ്ഥലത്തിന്റെ ഭംഗി കണ്ടപ്പോൾ അവർക്ക് അവിടെ കുറച്ചു ദിവസം താമസിക്കാൻ തോന്നി. എന്നാൽ അവിടെ ദുഷ്ടനായ ഒരു ചെന്നായയും താമസിച്ചിരുന്നു. ഇതറിയാതെ പന്നിക്കുട്ടികൾ വീട് പണിയാൻ ആരംഭിച്ചു. മൂന്ന് പന്നിക്കുട്ടികളും വ്യത്യസ്ത സ്വഭാവക്കാരായിരുന്നു. അതുകൊണ്ടു തന്നെ മൂന്നു പേരും മൂന്ന് വ്യത്യസ്തങ്ങളായ വീടാണ് പണിതത്. ആദ്യത്തെ രണ്ടു പന്നിക്കുട്ടികൾക്കും കളികളിലായിരുന്നു താൽപര്യം. എന്നാൽ മൂന്നാമത്തെ പന്നിക്കുട്ടി കഠിനാധ്വാനിയായിരുന്നു.

ആദ്യത്തെ പന്നിക്കുട്ടി കുന്നിന്റെ മുകളിൽ ചുറ്റും കണ്ട കുറച്ചു പുല്ലുകൾ ശേഖരിച്ച് അതുകൊണ്ട് വീട് പണിതു. അതുകണ്ട മറ്റ് പന്നിക്കുട്ടികൾ പറഞ്ഞു: "പുല്ലു കൊണ്ടുള്ള വീടിനു ബലം കുറവായിരിക്കും. അതിൽ താമസിച്ചാൽ സുരക്ഷിതം ആയിരിക്കില്ല." എന്നാൽ അവനതു കാര്യമായി എടുത്തില്ല. മറ്റു രണ്ടു പന്നിക്കുട്ടികളും വീടുണ്ടാക്കിയപ്പോൾ അവൻ കളിക്കാൻ തുടങ്ങി.

രണ്ടാമത്തെ പന്നിക്കുട്ടി അടുത്തുള്ള മുളങ്കാട്ടിൽ പോയി അവിടെനിന്നും മുളങ്കമ്പുകൾ ശേഖരിച്ചു കൊണ്ടുവന്നു. മുളങ്കമ്പുകൊണ്ട് വീട് പണിയാൻ തുടങ്ങി. ആദ്യത്തെ പന്നിക്കുട്ടിയെക്കാൾ സമയമെടുത്തായിരുന്നു രണ്ടാമത്തെ പന്നിക്കുട്ടി വീട് പണിതത്. എന്നാൽ ആ വീടിനും വേണ്ടത്ര ഉറപ്പുണ്ടായിരുന്നില്ല. ഇതുകണ്ട മൂന്നാമത്തെ പന്നിക്കുട്ടി പറഞ്ഞു: "ഈ വീടിനും ബലം കുറവാണ്. അതുകൊണ്ടു തന്നെ ഇതിലെ താമസവും സുരക്ഷിതമായിരിക്കുകയില്ല." എന്നാൽ അവന്റെ വാക്കുകൾക്ക് ആ പന്നിക്കുട്ടി വേണ്ടത്ര പ്രാധാന്യം കൊടുത്തില്ല.

രണ്ടു പന്നികളും വീടുപണി പൂർത്തിയാക്കി പലതരം കളികളിൽ മുഴുകിയപ്പോഴും മൂന്നാമത്തെ പന്നിക്കുട്ടി തന്റെ വീടിന്റെ പണിപ്പുരയിലായിരുന്നു. അവൻ തന്റെ വീട് പണിതത് കല്ലുകൾ കൊണ്ടായിരുന്നു. ദിവസങ്ങളെടുത്തായിരുന്നു അവൻ ഉറപ്പുള്ള തന്റെ വീടുപണി പൂർത്തിയാക്കിയത്. മൂന്നാമത്തെ പന്നിയും വീടുപണി പൂർത്തിയാക്കിയതോടെ മൂന്നുപേരും ഒരുമിച്ചു കളിച്ചുല്ലസിച്ച് ആ കുന്നിൻചരുവിൽ കഴിഞ്ഞു.

അങ്ങനെയിരിക്കെ ആ കുന്നിൻചരുവിലൂടെ പോയ ചെന്നായ മൂന്ന് പന്നിക്കുട്ടികളും കളിക്കുന്നത് കാണാനിടയായി. പന്നികളെ കണ്ടപ്പോൾ ചെന്നായ കരുതി: "നല്ല തടിച്ചു കൊഴുത്ത പന്നികൾ. ഈ മൂന്നു പന്നികളെയും കിട്ടിയാൽ പിന്നെ കുറച്ചു ദിവസത്തേക്ക് ആഹാരം തേടി അലയേണ്ടി വരുകയില്ല." ചെന്നായ ഉടൻ തന്നെ പന്നിക്കുട്ടികളുടെ നേർക്കു ചാടിവീണു. ചെന്നായയെ കണ്ടു ഭയന്നുവിറച്ച പന്നിക്കുട്ടികൾ അവരവരുടെ വീടുകളിലേക്ക് ഓടികയറി വാതിലടച്ചു.

ചെന്നായ ആദ്യം പോയത് പുല്ലു കൊണ്ട് മേഞ്ഞ പന്നിയുടെ വീട്ടിലേക്കായിരുന്നു. അവിടെ ചെന്ന് വാതിൽ മുട്ടി. ഭയന്നുവിറച്ച പന്നിക്കുട്ടി തന്റെ വീട് സുരക്ഷിതമായിരിക്കും എന്നു കരുതി വീട്ടിനകത്ത് ഒളിച്ചിരുന്നു. എന്നാൽ ചെന്നായ അധികം പ്രയാസം ഒന്നും കൂടാതെ തന്നെ ആ വീട് തകർത്തു അകത്തുകയറി. ഭയന്നുവിറച്ച ആ പന്നിക്കുട്ടി രണ്ടാമത്തെ പന്നിക്കുട്ടിയുടെ മുള കൊണ്ടുണ്ടാക്കിയ വീട്ടിൽ അഭയം തേടി. എന്നാൽ ചെന്നായ അവിടേക്ക് പാഞ്ഞു.

രണ്ട് പന്നിക്കുട്ടികളും മുള കൊണ്ടുണ്ടാക്കിയ വീട്ടിൽ സുരക്ഷിതരാണെന്ന് കരുതി. ചെന്നായ ആ വീടിന്റെ വാതിലിൽ മുട്ടി. തുടർന്ന് ആ വീടും തകർത്തു. ഭയന്നുവിറച്ച രണ്ട് പന്നിക്കുട്ടികളും കൂടി മൂന്നാമത്തെ പന്നിയുടെ വീട്ടിൽ അഭയം തേടി. മൂന്ന് പന്നികളും കൂടി ഭയന്നു വിറച്ച് ഇഷ്ടികകൾ കൊണ്ട് നിർമ്മിച്ച വീട്ടിൽ ഇരുന്നു. അവിടെയും എത്തിയ ചെന്നായ വാതിലിൽ മുട്ടി. തുടർന്ന് വീട് തകർക്കാനുള്ള ശ്രമവും തുടങ്ങി. എന്നാൽ ചെന്നായയ്ക്ക് ആ വീട് തകർക്കാൻ കഴിഞ്ഞില്ല. പല തവണ ശ്രമിച്ചിട്ടും നടക്കാത്തതിനെ തുടർന്ന് ചെന്നായ വീടിനു ചുറ്റും നടന്നു നോക്കി. അപ്പോഴാണ് വീടിന്റെ ചിമ്മിനി ചെന്നായയുടെ ശ്രദ്ധയിൽപെട്ടത്. ഉടൻതന്നെ ഒന്നും ചിന്തിക്കാതെ ചെന്നായ ചിമ്മിനി വഴി വീടിനകത്തേക്ക് കയറാൻ ശ്രമിച്ചു. എന്നാൽ ചിമ്മിനി വഴി ഇറങ്ങിയ ചെന്നായ അടുപ്പിൽ തിളച്ചു കൊണ്ടിരുന്ന വെള്ളത്തിൽ വീണു. തിളച്ച വെള്ളം ദേഹത്തു വീണപ്പോൾ അത് ജീവനും കൊണ്ടോടി.

ചെന്നായ പോയി കഴിഞ്ഞപ്പോൾ മറ്റു രണ്ടു പന്നികളും കൂടി മൂന്നാമത്തെ പന്നിയോട് പറഞ്ഞു: "സുഹൃത്തേ, ഞങ്ങളോട് ക്ഷമിക്കൂ. വീടു പണിതപ്പോൾ ഞങ്ങൾ നിന്റെ വാക്കു കേട്ടില്ല. എങ്ങനെയും വീട് പണി തീർത്ത് കളിക്കാനായിരുന്നു ഞങ്ങൾക്ക് താല്പര്യം. നീ അപ്പോഴും കഷ്ടപ്പെട്ട് ഉറപ്പുള്ള ഈ വീട് പണിതു. അതുകൊണ്ടാണ് നമുക്ക് മൂന്നു പേർക്കും നമ്മുടെ ജീവൻ തിരിച്ചു കിട്ടിയത്. ഇനി ഒരിക്കലും ഞങ്ങൾ മടിയന്മാരാകില്ല. ഞങ്ങൾക്ക് നിന്റെ വീട്ടിൽ അഭയം തന്നതിന് നന്ദി." അങ്ങനെ മൂന്ന് പന്നികളും സന്തോഷത്തോടെ വളരെക്കാലം അവിടെ കഴിഞ്ഞു. പിന്നെ ഒരിക്കലും ചെന്നായ പന്നിക്കുട്ടൻമാരുടെ വീടിന്റെ പരിസരത്തു പോലും പോയില്ല.

ഗുണപാഠം: കഠിനാധ്വാനത്താൽ നമ്മൾ ചെയ്യുന്ന ഒരു പ്രവൃത്തിയും വെറുതെയാകില്ല.

Section 2: Sentence-by-Sentence Translation

#	Malayalam (മലയാളം)	English Translation
1	പണ്ടു പണ്ടൊരിടത്ത് മൂന്ന് പന്നിക്കുട്ടികളുണ്ടായിരുന്നു.	Long, long ago, in a certain place, there were three little pigs.
2	അവർ മൂവരും നല്ല സുഹൃത്തുക്കളായിരുന്നു.	All three of them were good friends.
3	ഒരിക്കൽ അവർ യാത്ര ചെയ്തു മനോഹരമായ ഒരു കുന്നിൻചരുവിലെത്തി.	One day they traveled and reached a beautiful hillside.
4	എന്നാൽ അവിടെ ദുഷ്ടനായ ഒരു ചെന്നായയും താമസിച്ചിരുന്നു.	However, an evil wolf also lived there.
5	ഇതറിയാതെ പന്നിക്കുട്ടികൾ വീട് പണിയാൻ ആരംഭിച്ചു.	Without knowing this, the little pigs began to build houses.
6	മൂന്ന് പന്നിക്കുട്ടികളും വ്യത്യസ്ത സ്വഭാവക്കാരായിരുന്നു.	All three little pigs had different temperaments.
7	ആദ്യത്തെ രണ്ടു പന്നിക്കുട്ടികൾക്കും കളികളിലായിരുന്നു താൽപര്യം.	The first two little pigs were interested only in playing.
8	എന്നാൽ മൂന്നാമത്തെ പന്നിക്കുട്ടി കഠിനാധ്വാനിയായിരുന്നു.	But the third little pig was a hard worker.
9	ആദ്യത്തെ പന്നിക്കുട്ടി കുറച്ചു പുല്ലുകൾ ശേഖരിച്ച് അതുകൊണ്ട് വീട് പണിതു.	The first little pig collected some grass and built his house with it.
10	"പുല്ലു കൊണ്ടുള്ള വീടിനു ബലം കുറവായിരിക്കും."	"A house made of grass will have little strength."
11	രണ്ടാമത്തെ പന്നിക്കുട്ടി മുളങ്കമ്പുകൊണ്ട് വീട് പണിയാൻ തുടങ്ങി.	The second little pig began to build a house with bamboo poles.
12	അവൻ തന്റെ വീട് പണിതത് കല്ലുകൾ കൊണ്ടായിരുന്നു.	He (the third pig) built his house with stones.
13	ദിവസങ്ങളെടുത്തായിരുന്നു അവൻ ഉറപ്പുള്ള തന്റെ വീടുപണി പൂർത്തിയാക്കിയത്.	It took days for him to complete his sturdy house.
14	ചെന്നായ മൂന്ന് പന്നിക്കുട്ടികളും കളിക്കുന്നത് കാണാനിടയായി.	The wolf happened to see the three little pigs playing.
15	ചെന്നായയെ കണ്ടു ഭയന്നുവിറച്ച പന്നിക്കുട്ടികൾ അവരവരുടെ വീടുകളിലേക്ക് ഓടികയറി വാതിലടച്ചു.	Frightened at seeing the wolf, the little pigs ran into their respective houses and shut the doors.
16	ചെന്നായ അധികം പ്രയാസം ഒന്നും കൂടാതെ തന്നെ ആ വീട് തകർത്തു.	The wolf broke down that house without much difficulty.
17	എന്നാൽ ചെന്നായയ്ക്ക് ആ വീട് തകർക്കാൻ കഴിഞ്ഞില്ല.	But the wolf could not break that (stone) house.
18	ചെന്നായ ചിമ്മിനി വഴി വീടിനകത്തേക്ക് കയറാൻ ശ്രമിച്ചു.	The wolf tried to enter the house through the chimney.
19	ചിമ്മിനി വഴി ഇറങ്ങിയ ചെന്നായ അടുപ്പിൽ തിളച്ചു കൊണ്ടിരുന്ന വെള്ളത്തിൽ വീണു.	The wolf, coming down through the chimney, fell into the boiling water on the stove.
20	തിളച്ച വെള്ളം ദേഹത്തു വീണപ്പോൾ അത് ജീവനും കൊണ്ടോടി.	When the boiling water fell on its body, it ran for its life.
21	"ഇനി ഒരിക്കലും ഞങ്ങൾ മടിയന്മാരാകില്ല."	"Never again will we be lazy."
22	കഠിനാധ്വാനത്താൽ നമ്മൾ ചെയ്യുന്ന ഒരു പ്രവൃത്തിയും വെറുതെയാകില്ല.	No work that we do with hard work goes in vain.

Section 3: Vocabulary

Malayalam	Transliteration	Part of Speech	English Meaning
പന്നിക്കുട്ടി	panni-kkutti	noun	little pig, piglet
സുഹൃത്ത്	suhṛtt	noun	friend
യാത്ര	yātra	noun	journey, travel
കുന്നിൻചരുവ്	kunnin-charuvu	noun	hillside, slope
ഭംഗി	bhaṅgi	noun	beauty
ദുഷ്ടൻ	duṣṭan	noun / adjective	evil one, wicked
ചെന്നായ	chennāya	noun	wolf
വീട്	vīṭu	noun	house
പണിയുക	paṇiyuka	verb	to build, to construct
വ്യത്യസ്തം	vyatyastam	adjective	different
കളി	kaḷi	noun	play, game
താൽപര്യം	tālparyam	noun	interest
കഠിനാധ്വാനി	kaṭhinādhvāni	noun	hard worker
പുല്ല്	pullu	noun	grass
ബലം	balaṁ	noun	strength
സുരക്ഷിതം	surakṣitaṁ	adjective	safe, secure
മുളങ്കമ്പ്	muḷaṅkampu	noun	bamboo stick / pole
കല്ല്	kallu	noun	stone
ഇഷ്ടിക	iṣṭika	noun	brick
ഭയം	bhayaṁ	noun	fear
വാതിൽ	vātil	noun	door
ചിമ്മിനി	chimmini	noun	chimney
തിളയ്ക്കുക	tiḷaykkuka	verb	to boil
ജീവൻ	jīvan	noun	life
ഗുണപാഠം	guṇapāṭhaṁ	noun	moral, lesson
കഠിനാധ്വാനം	kaṭhinādhvānaṁ	noun	hard work